Með því að fræða starfsfólk um hvað IKEA stendur fyrir og hvaða merkingu vörumerkið hefur styrkjum við ímynd þess innanhúss. Starfsfólk sækir ekki aðeins námskeið heldur sést það líka í verki hvaða gildi vörumerkið stendur fyrir. Það sem Svíarnir kalla kraftsamla sést til dæmis reglulega í okkar starfi þegar þarf að sýna virkilega samheldni og jafnvel stíga út fyrir þau mörk sem starfslýsingin krefst. 
Á liðnu ári fékk starfsfólk langþráð tækifæri til að fagna saman aftur á ýmsum viðburðum, þar á meðal á árlegri uppskeruhátíð í september. Þar var ný sjónvarpsauglýsing frumsýnd, þar sem sænsk-íslenski drengurinn Jóhann kenndi bæði starfsfólki, og síðar landsmönnum öllum, sænskan framburð á IKEA vörum. IKEA grunnurinn á sterkar rætur í Suður-Svíþjóð þar sem eru haldin námskeið og fundir árlega fyrir starfsfólk IKEA um allan heim. Þangað hefur starfsfólk IKEA á Íslandi einnig sótt sér innblástur sem skilar sér að lokum í sterkara vörumerki.

Sjálfbærni er yfir og allt um kring í rekstri IKEA og er alltaf eitt af áhersluatriðunum í markaðsefni fyrirtækisins, hvort sem verið er að lýsa sjálbærum eiginleikum vöruúrvalsins, kynna stefnur eða sýna hvernig hægt er að lifa sjálfbærara lífi heima fyrir. Undanfarið ár höfum við þar að auki átt farsælt samstarf við Plastplan á árinu, sem hefur tekið plast sem fellur til hjá okkur og framleitt úr því nytjahluti. Innanhúss settum við flokkun í fókus og gerð var flokkunarhandbók og haldin flokkunarnámskeið fyrir allt starfsfólk. IKEA hefur um árabil stutt vel við slysavarnir barna og nú í ár var sá stuðningur efldur samhliða aukinni áherslu IKEA á heimsvísu í þeim málum, og er frekari frétta að vænta af því fljótlega.