Stefna Krónunnar er ávallt að vera ódýr, holl, umhverfisvæn og snjöll. Við viljum vera leiðandi í tækninýjungum á matvörumarkaði. Skannað og skundað er ný tæknilausn hjá Krónunni sem hefur verið í stöðugri þróun með það að markmiði að einfalda líf viðskiptavina okkar. Þetta er hluti af snjallverslun Krónunnar þar sem viðskiptavinir gátu í fyrsta sinn á Íslandi verslað innkaupakörfuna með eigin síma. Viðskiptavinurinn notar símann og sparar þannig tímann. Með lausninni geta viðskiptavinir skannað vörur, greitt og gengið út án þess að fara í röð, á beltakassa eða í sjálfsafgreiðslu. Á aðeins einu ári hefur notendum fjölgað gífurlega, en nú eru um 45 þúsund matarkörfur verslaðar í hverjum mánuði með snjalllausninni. Snjallverslun Krónunnar mældist með hæstu meðmælatryggð meðal viðskiptavina á smásölu-markaði árið 2022 samkvæmt Maskínu, ásamt því að vera valin stafræna lausn ársins á íslensku vefverðlaununum. Með aukinni sjálfvirknivæðingu viljum við einfalda viðskiptavinum Krónunnar lífið með því að bjóða upp á tímasparandi lausn en jafnframt styður lausnin við áherslur Krónunnar um upplýst val þar sem viðskiptavinir geta með notkun Skannað og skundað verið mun meðvitaðri en áður um vöruverð og endanlegt verð á körfu. 

Viðskiptavinir Krónunnar gera í dag auknar kröfur um úrval af umbúðalausum vörum og vilja að sama skapi að stærri fyrirtæki taki stærri skref í átt að hringrásarhagkerfinu. Krónan hefur markað sér virka umhverfisstefnu og eru áhersluatriði stefnunnar helst þrjú. Eitt þeirra er í takt við kröfur almennings og snýr að því að Krónan ætlar sér að sýna ábyrgð í vali á umbúðum og sorpflokkun með því að bjóða umbúðalausar lausnir þegar hægt er og velja umhverfisvænar umbúðir fram yfir aðrar. Sömuleiðis flokkar og endurvinnur Krónan allt plast og allan pappa sem fellur til í starfseminni.  Við innleiddum nýjar lausnir fyrir viðskiptavini okkar til að stuðla frekar að umbúðalausum lífsstíl, sem dæmi kynntum við til sögunnar umbúðalausan þurrvörubar.

Krónan opnaði einnig þrjár nýjar og glæsilegar verslanir í Skeifunni, Borgatúni og á Akureyri og hafa viðtökur frá viðskiptavinum farið langt yfir okkar björtustu vonir.

Viðskiptavinir okkar skipta okkur öllu máli. Við köllum okkar markhóp „Krónuvini,“ fólk sem leitar einfaldra en hollra lausna í amstri dagsins, með nútímaleg gildi og er umhugað um umhverfið.

Við höfum skapað sérstöðu með öflugu samtali við okkar viðskiptavini með því að hlusta á þá og færa fram lausnir sem mæta þeirra þörfum. Sem dæmi um það er afpökkunarborðið í andyri verslanna Krónunnar þar sem viðskiptavinir geta skilið eftir umbúðaplastið og við sjáum til þess að það fari í endurvinnslu, sem og þurrvörubar sem styður umbúðalausan lífsstíl.

Við bjóðum upp á nýjar tæknilausnir sem höfða til nýrra markhópa sem og einfalda líf núverandi Krónuvina. Þetta eru tímasparandi lausnir eins og Skannað og skundað þar sem viðskiptavinir geta verslað og greitt með símanum sínum, en jafnframt styður þetta við áherslur Krónunnar um upplýst val þar sem viðskiptavinir geta verið mun meðvitaðri en áður um vöruverð og endanlegt verð á körfu.